Filmsfelagið
Hvønn mikudag sýnir Havnar Bio, undir heitinum Filmsfelagið, nýggjar filmar, sum eru listaliga áhugaverdir, men tó ofta ókendir. Úti í heimi verður hetta slagið av filmum onkuntíð nevnt arthouse filmur.
Sjálvandi er ymiskt, hvat ein biografgangari og ein annar halda verða listaliga áhugavert og viðkomandi, men Havnar Bio roynir, við átakinum Filmsfelagið, við eini miðsøkjandi leið, sum annan vegin savnar áskoðarar og hin vegin gevur atgongd til film, sum ikki verður settur á vanligu skránna.
Havnar Bio heitti á Birgir Kruse, sum var formaður í gamla Filmsfelagnum, og Ole Wich, sum var nevndarlimur, at sleppa at brúka heitið og at velja filmar við ráðgeving frá filmsáhugaðum. Upprunaliga felagið varð stovnað í okkara hølum, Havnar Bio, í 1962 undir navninum Filmslistafelagið. Hetta felagið sovnaði í 1975. Í 1984 varð felagið endurstovnað sum Filmsfelagið og helt sær til 1992, oftast við sýningum í Leikhús Bio í Sjónleikarhúsinum. Tey, ið stjórna Filmsfelagið í dag eru: Birgir Kruse, Ole Wich, Rannvá Jónsdóttir og Jana Mortensen
Nú er Filmsfelagið endurstovnað í samráð við táverandi nevnd undir sama heiti og tí einfalda endamáli at vísa listaliga viðkomandi filmar í Havnar Bio. Filmarnir verða sýndir mikudagar.
Skráin hjá Filmsfelagnum verður kunngjørd í góðari tíð á Facebooksíðuni hjá felagnum, og á hesi heimasíðu, eins og galdandi er fyri allar aðrar filmar í Havnar Bio.
Fylg Facebooksíðuni hjá Filmsfelagnum, har tey leggja tilfarð út um filmarnar: Filmsfelagið Facebook Síða
Sýningarnar eru almennar og krevja ikki limaskap.
Vælkomin í Filmsfelagið!
Komandi filmar hjá Filmsfelagnum
Flow
FILMSFELAGIÐ: Mikukvøldið 30. apríl Kl. 17:30
Lettiski Oscarvinnarin, Flow, er ein animatiónsfilmur uttan dialog. Í hesi familjuvinarligu søgu, ið er fyri alt húskið, fylgja vit fleiri dýrum, sum eftir at menniskjuni eru horvin, fara umborð á ein bát fyri at yvirliva. Her er ein ketta, sum dámar best at vera einsamøll, eitt vatnsvín, ið ikki orkar so nógv, ein stuttligur hundur av retrivara slagnum, ein lemurur, ið savnar altskyns lutir, og ein skrappur rovfuglur úr Afrika. Báturin siglir stillisliga gjøgnum gomul landsløg, har vatnflóð hevur verið. Skal ferðin eydnast, mugu dýrini semjast og samstarva, hvussu ymisk tey so eru. Flow er ein sjáldsamur, vakur og kensluløddur animatiónsfilmur, har vit fyri størsta partin eygleiða dýrini, soleiðis sum tey eru í náttúruni. Flow, sum varð frumsýndur í Cannes og vann ein Golden Globe, er mest sæddi filmur í Lettlandi. Leikstjórin, Gints Zilbalodis, fór undir filmin í 2019 og brúkti open surce forritið Blender. Í takkartaluni, tá hann fekk Oscarvirðislønina, segði hann: “We are all in the same boat and must overcome our differences to find ways to work together.” Við miðlar segði hann við sama høvið: “People are tired of bad news and maybe this film represents something that feels optimistic and hopeful in regard to the country’s self-esteem.”
The End
Filmsfelagið: Mikukvøldið 07. mai 2025 kl. 20:00
Í Umhvørvisvikuni hjá Tórshavnar kommunu visa vit saman við Filmsfelagnum nýggja altjóða filmin hjá Joshua Oppenheimer, sum á enskum er upptikin í Írlandi. Amerikanski leikstjórin, sum býr í Danmark, er tvær ferðir fyrr Oscartilnevndur.
Sterben
FILMSFELAGIÐ: MIKUKVØLDIÐ 14. mai Kl. 20:00
Matthis Glasner, sum er føddur í Hamburg í 1965, hevur gjørt stórfilmin Sterben, ið fær so mikil lovorð frá ummælarum, at hann verður mettur sum ein púra nýggjur varði í altjóða filmsgerð. Á týsku plakatini verður spælt uppá orðini sterben, at doyggja, og streben, at stremba og tráa eftir nøkrum. Sterben er ein svørtskemtilig og tó nemandi ættarsøga um lív, deyða - og alt, sum er har ímillum. Við Lars Eidinger, sum er kendur frá Babylon Berlin í høvuðsleiklutinum, vann Sterben tríggjar virðislønir í høvuðskappingini á filmstevnuni í Berlin. Í filminum fylgja vit og fáa innlit í dysfunktionellu familjuviðurskiftini hjá Lunies og teimum, sum í nógv ár ikki hava havt nakað sum helst at vera saman um. Mamman, Lissy, sær fram til ta stóru frígering, tá demensrakti maðurin flytir á røktarheim. Sonurin, Tom, er dirigentur og arbeiðir við episka tónleikaverkinum ”Sterben”, meðan hann roynir at halda seg flótandi omaná í tónleikavinnuni, halda seg væl við ein depressivan vin og hevur tikið á seg leiklutin sum stjúkpápi hjá fyrrverandi konuni, sum nú er uppá vegin. Samstundis fer systurin, Ellen, at fríggja við einum giftum tannlækna, meðan hon doyvir allar sorgir í brennivíni. Tá deyðin dukar á dyrnar, møtast tey aftur. Men úrslitið er um eina leið syndarligt, láturligt - og óvæntað.
Riefenstahl
Filmsfelagið: Mikukvøldið 21. mai kl. 20:00
Leni Riefenstahl (1902-2003) verður í flestu filmisku og søguligu verkum mett sum ein av mest umstríddu, kontroversiellu, kvinnum í tjúgindu øld. Eftir arbeiðsboðum frá Hitler og Goebbels gjørdi hon týdningarmestu propagandafilmarnar fyri nazistarnar, ’Triumph des Willens’ (1934) og ’Olympia’ (1936/38), sum báðir eru fyltir við tilgjørdari kropsdyrkan og sublimum estetikki. Við støði í øllum teim skjølum, sum funnin vórðu í deyðsbúgvinum eftir Leni Riefenstahl, privatum filmumsupptøkum, fotomyndum og brøvum, hevur leikstjórin Andres Veil, sum er føddur í Stuttgart í 1959, sett saman ein mynd av sjálvmótsigandi listakvinnuni, sum alt lívið stríddist við ummælið, komandi eftirmæli og egnu livdu fortíðina, uttan nakrantíð at angra. Og hon var aldri einsamøll, bæði tá hon var eitt kent og virkið navn fyri nazistarnar og seinni, tí brævasavnið er stórt, og skrásettar telefonsamtalur skjalprógva, at vanligi týski borgarin, eisini í eftirkrígsárunum, longdist eftir eini sterkari og stýrandi hond.
Den Stygge stedsøster
Filmsfelagið: Mikukvøldið 28. Mai kl. 20.00
Tað er ikki lætt at vera ein ljót fostursystir. Elvira droymir um Julian prins, sum í vakurleika ber av øllum. Tá hann bjóðar í veitslu, at finna røttu brúðrina, vil Elvira gera alt, ið stendur í hennara makt, at gerast hansara hjartans kosna. Tí noyðist hon at leggja seg undir náðileysu krøvini í kongaríkinum øllum um ein lýtaleysan vakurleika. Síðani má hon skúgva hina gandavøkru Øskufíu til viks, so eingin varnast hana. Sum tað síðsta skal hon passa skógvin á fótinum. Hin ljóta fostursysturin er ein óvanligur filmur, sum snarar og vendir ranguna út á kenda ævintýrinum um Øskufíu, har fostursysturin nú fær høvuðsleiklutin. Filmurin tekur støði í klassiska ævintýrinum hjá brøðrunum Grimm, har fostur- ella gávusysturin noyðist at skera tærnar av fótinum, skal hon sleppa í skógvin. Leikstjóri og handritahøvundur er hin unga norska Emilie Blichfeldt. Í filminum, sum varð frumsýndur á Sundance Film Festival, vigar hon á tromini millum vakurleika og ræðuleika við einum hvøssum broddi av skemti í eini ævintýrligari blanding við body horror. Í høvuðsleiklutinum sum Elvira, er Lea Myren framúr í fyrsta leiklutinum á filmi. Thea Sofie Loch Næss er Øskufía, Ane Dahl Torp er stjúkmóðirin og Flo Fagerli er yngra systurin Alma.
The Phoenician Scheme
Filmsfelagið: Mikukvøldið 04. juni kl. 20:00
Nýggjasti filmur hjá fleirfalt virðislønta amerikanska leikstjóranum, Wes Anderson (f.1969), verður frumsýndur á filmstevnuni í Cannes, har hann er við í høvuðskappingini undir heitinum “The Phoenician Scheme”. Eins og undanfarnu filmar Andersons er hann ein sniðfundig søga, hesuferð um njósnarar og um faðir og dóttir, sum í eini familjufyritøku ikki duga so væl at starva saman. Filmaða søgan snarar um svik og at svíkja, og um torførar moralskar avgerðir. Wes Anderson hevur í hesum nýggjasta filmi, “The Phoenician Scheme”, fingið eina at síggja til endaleysa røð av stjørnum at glampa og bleiktra, so sum Tom Hanks, Scarlett Johansson, Bill Murray, Bryan Cranston, Benedict Cumberbatch og Benicio Del Toro, ið hevur greiða og avgerandi høvuðsleiklutin. Undan filmstevnuni í Cannes eru fleiri ummælarar, ið siga, at ”The Phoenician Scheme” er ársins filmiska biografhending við øllum teim stjørnum, hesi sermerkti leikstjóri nú rullar út fyri okkum á hvíta løriftinum.